1. |
Ingesperrt Mit Dir
03:46
|
|||
Ingesperrt mit Dir
In Zeide wie denne, sollt ma erkenne war das alles nur leeres Gelaber oder hat ma sich werklich so gär
Ma hält sich fa selbschdverständlich Alles fa unendlich un würd das netmol merke, wenn die Zeit e annerie wär
Du bischd ingesperrt mir mir un ich bin ingesperrt mit dir awa ich fühlmich kä Stick gefang weil mit Nimmand wär ich liwwa (ingesperrt) hier
Du nemmschd mir mei Ängschde un ich hoff, ich dir dein un an Stelle, wo ich's normal wär bin jetzt e bissje wenischer gemein
Ich liebe die Wärme in deine Aue unser blindes Vertraue das net selbschdverständliche sich selbschdverständlich sein
Du bischd ingesperrt mir mir un ich bin ingesperrt mit dir awa ich fühlmich kä Stick gefang weil mit Nimmand wär ich liwwa (ingesperrt) hier
Ich vermisse Freunde un Familie, jeden Enzelne sehr Awa mit dir zusamme fällt ma das net ganz so schwer
Mit dir is es e bissje so als wäre se do dich zu han macht mich froh oh ich han dich so unglaublich gär
Du bischd ingesperrt mir mir un ich bin ingesperrt mit dir awa ich fühlmich kä Stick gefang weil mit Nimmand wär ich liwwa (ingesperrt) hier
|
||||
2. |
Penner, Alder Freund
03:52
|
|||
3. |
Sauwere Ärsche
05:06
|
|||
Sauwere Ärsche
Wenn jeder an sich denkt, is an jeden gedacht
un wenn jeder iwa die Annere lacht, is a iwer jeden gelacht
genau die Art von Egoismus hat uns doch krank gemacht
In da Krankehäuser sterwe Leut un paar hunnert Meder weiter werd Picknick gemacht
wenn jeder nur e bissje an Annere dächt, wär ach an jeden gedacht
un es dud ach ganz gudd, wenn ma mo iwa sich selwa lacht
es is zeit, umzedengge, Die Welt kommt ins Wangge
un Zeit, ufzehere, um Klobabier zu zangge
Es geht ums nackte Üwerläwe un mir zangge um Klobabier
Gott wie arm! Is es denn wirklich so scheiße hier?
Se opfern sich uf, unser Ärzte, Pflescher un Schweschdern
unser Helde von heut sin die Opfer von geschdern
Verbrannt ime kranke Gesundheitssystem
sins nie die Kapitäne, die mit ihre Schiffe unnergehn
Es is Zeit zum Umdenke, es is Zeit für e Dangge
un Zeit ufzehere, sich um Klobabier zu zangge.
Es trennt uns e Virus, es eint uns die Angschd
Du bisch net allähn, wenn de um dei Liebschde bangschd
Leut, die sich meide, Leut, die sich vermisse
ängstliche Aue blicke ins Ungewisse
oder eint uns der Virus un trennt uns die Angschd
wenn de Nächstenliebe willschd awa enfach nimmeh kannschd
Es leide am Meischde die Arme, die Schwache un Krangge
während sich die, die noch Kraft han um Klobabier zangge
un wedder denk ich an die Pflescher, Schweschdern un Ärzte
die ihr Ängschde iwawinne, sogar die ärgschde
um Annere zu helfe, um Leide zu lindern
bescheiden alles genn, Schlimmeres zu verhindern
das gibt Kraft, es gibt Halt un macht Mut
es is Zeit mol zu sahn, wie gut uns das tut
Es wär Zeit für e Umarmung, doch es geht nur e Dangge
heren doch bidde uf, wehe Klobabier ze zangge
|
||||
4. |
In Meiner Blindhät
03:41
|
|||
In meina Blindhät
In meina Blindhät han ich gedenkt, mei Herz wär net klänsekrien
Es wär wild un so Gott verdammt frei
In meina Blindhät han ich garnet gemerkt
mei Herz war immer an da Lein
Blindhät is es Seche oder Fluch
frieher war ich so froh, jetzt is ma nix genuch
In meina Blindhät hot ich Fatraue in Leit
Es wäre Freunde han ich immer gedenkt
all die fafickte gudde Worde ware nur Phrase
doch ich han ne stets Glawe geschenkt
Blindhät is es Seche oder Fluch
frieher war ich froh, jetzt is ma nix genuch
Blindhät is es Segen oder Fluch
frieher war ich froh, jetzt is ma nix genuch
In meina Blindhät war ich stark
jetzt!bin ich schwach
falier mich vill zu oft in Gedangge
In meina Blindhät han ich noch oft gelacht
Blindhät is es Seche oder Fluch
frieher war ich froh, jetzt is ma nix genuch
|
||||
5. |
Für Paul
03:46
|
|||
Für Paul
Ich nahm ihn wahr als Realisten, der stets relativiert.
Grad, in Allem gudd durchdacht und klar strukturiert.
Laut, ach zwische da Zeile präzise, wie jeder seiner Schläch uf da Snare,
wie die Musik, die er spielte, war im Grunde (genomm) ach Er
Aus dem Vater eines Freundes, wurd Bandmitglied, wurd Freund.
Unnerschied uns ach unser Wese, han ma doch de gleiche Traum geträumt.
Ach ich werre die gudde Gespräche vermisse, sei offenie, ehrlichie Art
Paul wusst immer e Antwort, Paul hott immer e Rat.
Die Klarheit seiner Gedanke, sei messerscharfer Verstand
machte ne stark in seiner Haltung awa nie arrogant
Ich sah ne lache, weine, ihn sich freie un traure
awa nie sah ich ne, sich in Selbschdmitleid inmaure
Das ledschde Lied, das er uns spielte, so verdammt scheen, zugleich schlimm
Gesicht un Körper gezeichnet von Krankheit awa mit kräfdischer Stimm
Un singe ach Annere, sei Platz bleibt leer
weil nimmand singt die Lieder wie Er.
|
||||
6. |
Ballawa Ballade
04:17
|
|||
Ballawa Ballade
Ich schätze, jeder kennt die Art von Träume.
Ich schätze, jeder kennt das Gefiehl.
So wie verlorene Liebe
Die Zeit, mein Freund, is e Miehl
Sie zermahlt Hoffnung un Träume
Sie nimmt, was teuer und lieb
Siehschd nix no vorne un verschwomm no hinne
alles was bleibt is nur e Lied
Es is die Ballawa Ballade
Se hallt durch Zeit un Raum
Alles schwebt! Ich denk, ich kann fliehe
Dann genn ich wach. Es war nur e Traum.
Wie um alles in da Welt soll ich das akzeptiere?
Wie um alles in da Welt, wenn ich's doch net versteh?
Wie um alles in da Welt soll ich kabbiere?
Die alde Band, se gebbts nemmeh
Oh mir hodde so scheene Lieder!
Ma hodde e sooo scheenie Zeit!
Awa hin un wieder,
steht die alte Band zum Spille bereit
un dann spille ma die Ballawa Ballade
Se hallt durch Zeit un Raum
Alles schwebt! Ich denk, ich kann fliehe
Dann genn ich wach. Es war nur e Traum.
|
||||
7. |
Gelwa Schnee
03:09
|
|||
Gelwa Schnee
Se vaännere ihr Aussiehn, es Vahalde bleibt gleich.
Schnee werd weider gelb, wenn ma nin seicht.
Kenner baut e Schneemann aus gelwem Schnee.
Un e gelwa Schneeball dud dobbelt so weh.
Er schmeckt net noh Zitrone! Er schmeckt no Urin!
Un Nazis bleiwe Scheiße! Ach wenn se heit annerschd aussiehn.
Nazis bleiwe Scheiße! Ach wenn se heit annerschd aussiehn.
Politiker sin Lumbe! Die sauche sich gär voll.
Un was dodebei rauskommt is oft garnet so doll.
Se vaännere ihr Handeln. Es Aussiehn bleibt gleich.
Un Schnee werd weider gelb, wenn ma nin seicht.
Er schmeckt net noh Zitrone! Er schmeckt no Urin!
Un Nazis bleiwe Scheiße! Ach wenn se heit annerschd aussiehn.
Nazis bleiwe Scheiße! Ach wenn se heit annerschd aussiehn.
|
||||
8. |
Zwä Worde
04:22
|
|||
Zwä Worde
Es gebbt nur zwä Worde, die ich fa dich han
Es gebbt nur zwä Worde mit denne ich alles sahn kann
Ich sahn: „Lieb dich, wenn du all Empathie valoor haschd
un dich domit uf Facebook wischdisch machschd.“
Ich sahn: „Lieb dich, wenn fa dich alles soooo enfach is!
Mit deine halwe Wohrhäde bleib ma geschiss!
Ich sahn: “Lieb dich!” Un ich hoffe, es kommt bei dir ahn!
Ich han zwä Worde fa dich, an denne kannsche dich reiwe!
Zwä Worde, so enfach, sogar du kannschd die schreiwe!
Ich sahn: “Lieb dich, wenn de dei Angschd mit Hass kompensierschd!
Lieb dich, wenn du’s schon nommo net kabbirschd!”
Ich sahn: “Lieb dich, wenn immer dei Antword Gewalt is!
Lieb dich, wenn dei Herz werklisch si kalt is!”
Ich sahn: “Lieb dich!” Un hoffe, es kommt bei da ahn
Zwä Worde sin iwwarisch von da dausende, dich ich hot.
Zwä Worde bleiwe, awa die mache dich flott!
Ich sahn: “Lieb dich!.....
lieb dich!”.....
Ich sahn: “Lieb dich!....
jooo lieb dich!”
Ich sahn: “Lieb dich!” un hoffe, es kommt bei dir ahn.
Ich sahn: “Lieb dich besser mol selwa, weil das sonschd Kenner mache mahn!
|
||||
9. |
Ich Kriehns Net Hin
05:03
|
|||
Ich kriens net hin
Seit langer Zeit schon unberührt
niemand, der sie sieht un net die Schwermut spürt
Die alt Gitarre mit da roschische Saide,
rudimentärer, stummer Zeuge von bessere Zeide.
De falsche Ort, de fapassde Moment,
sie war so jung un hot so vill Talent
un der alde Hit werd wedder angestimmt
un es jedesmol jemand Anneres, der ne singt
Ich würd so gere sin,was ich awa enfach garnet net bin
ich würd gere sin, was ich net bin awa ich kriens net hin, ich kriens net hin
im Park uf da Bank, sitzt e alder Mann,
der ennem beim bloße angugge schon läd dun kann.
Die Bän wie e O, de Rigge is krumm,
ach wenn em kenner zuheert, murmelt er immer was rum.
Die Schdirn gerunzelt, die Aue gugge ins Lääre
„ach ich hätt un wollt un wär so gäre“
un der alde Hit werd wedder angestimmt
un es is schon wedder jemand anneres, der ne singt
Ich würd so gere sin,was ich awa enfach garnet net bin
ich würd gere sin, was ich net bin awa ich kriens net hin, ich kriens net hin
vom Zweifel zerfress schreib ich mei Lieder un leide
ob se gudd oder schlecht sin, kann ich selbschd net entscheide
awa ich sing se eisch liewa als denne alde hit
un jedes Mol hoff ich,es singt jemand mit
un der alde Hit werde wedder angestimmt
un diesmol bin Ich's der ne singt
Ich würd so gere sin,was ich awa enfach garnet net bin
ich würd gere sin, was ich net bin awa ich kriens net hin, ich kriens net hin
|
||||
10. |
Schwatz Un Weiß
04:12
|
|||
Schwatz un weiß
Mols ma schwatz oder mols mol weiß
Mach aus Scheiße Gold un es stinkt immer noch no Scheiß
Do is nix rischdisch, do is nix falsch
Es dud erschd weh, wenn de fallschd (uffknallschd)
Wenn du annerschd bischd, bischd du allähn
Entwedder schwimmschd mim Strom oder gehschd unner wie e Stähn
Die Wolke färwe sich von weiß zu schwatz
Ich glab glei gebbts was uf de Latz
Hadda Wind bloost dorsch die Bääm
Als wenn de Deiwel persönlich käm
Du wiegschd dich besser in dem Wind
Oder du werschd weggebloost mei kind
Mols ma schwatz oda mols ma weiß
Hinnerm Rigge bockt die Geiß
Erschd paschde dich weiß an un dann schwatz
Ufrischdischkät breschds Gnick mei Schatz
Wenn du annerschd bischd, bischd du allähn
Entwedder schwimmschd mim Strom oder gehschd unner wie e Stähn
Es Babier is weiß, es Kabbiddel schwatz
Un was ma schreiwe is fa die Katz
Frieher hodde se mol Herz die Leit
Dofor hat ma heit kää Zeit
Wenn du annerschd bischd, bischd du allähn
Entwedder schwimmschd mim Strom oder gehschd unner wie e Stähn
|
||||
11. |
Träne Im Rähn
04:12
|
|||
Träne im Rähn
Naacht um Nacht farrauschd
du mergschd, dass du e Päusje brauchschd
dass du zu dief abtauchschd
un dass du dich doran berrauschd
Es is die Taubhät, die de fiehlschd,
wenn du zu dief dren wiehlschd
un dann denggsche: „ach ich dennge zu viel!“
un imma dann kommt das Gefiehl
Du fiehlschd dich dann so allähn
un gehschd schbaziere im Rähn
Awa im Rähn is es scheen
do kamma die Träne net sehn
Du fiehschd dich einsam, de fiehlschd dich leer
Das alde Lied, das singsche ger
rennschd nur Erinnerunge hinnerher
awa die fablasse immer mehr
Du fiehlschd dich wedda so allähn
un gehschd schbaziere im Rähn
Awa im Rähn is es scheen
do kamma die Träne net sehn
Du fiehlschd dich emmer so allähn
un gehschd schbaziere (wie e nassa Hund drauss) im Rähn
Awa im Rähn is es scheen
do kamma die Träne net sehn
|
||||
12. |
||||
Noch e Bier, Noch e Schnaps
Bring ma noch e Bier un noch e Schnaps
un mach schnell demit
Bring ma noch e Bier un noch e Schnaps
ich han dorschd
Mei Fra hat mich heit moje sitze geloss
un hat alles mitgeholl, was ich mol hott
am kihlschrank hing nur e Zeddel
geh du mim Hund raus, ich bin fort
Un mei Hund, von dem ich gedenkt han er wär so treu
hat sich von da Lein losgeriss un is abgehau
jetzt stehn ich do, allään un falor
ich bin die aller ärmschd Sau
Es war e langer, es war e hadda, es war e schmerzhafter Daa
jetzt brauch ich e Bier un e Schnaps brauch ich aa
Bring ma noch e Bier un noch e Schnaps
un mach schnell demit
Bring ma noch e Bier un noch e Schnaps
ich han dorschd
un dann komm ich se spät uf die Awet
weil ich meinem Hund no gelaaf bin
An da alt Klärgrub falier ich die Spur
ich bin geschdolbat un falle nin
Mei Scheff hat herzhaft gelacht
als ich em von meiner Misere fazählt hann
Dann mault er: „mach dei awet!“
„ab moje bleische dahemm, hasche fastann!“
Es war e langer, es war e hadda, es war e schmerzhafter Daa
jetzt brauch ich e Bier un e Schnaps brauch ich aa
Bring ma noch e Bier un noch e Schnaps
un mach schnell demit
Bring ma noch e Bier un noch e Schnaps
ich han dorschd
|
||||
13. |
||||
Un die Hand, die mich hielt, wurd die Hand, die ich hielt
han in dei Aue geblickt un net gemerkt, wie der Aueblick verflieht
Uf deine Schullere hasche mich dorsch die Welt getrah
Ich musst nie weder Bitte, noch Dangge sahn
gabschd Alles fa mich, haschd Alles meschlich gemacht
Jetzt ist is die Zeit komm, ze Ruhe
Gunaacht Vadder! Gunaacht
Gunaacht Vadder, (schlof gudd) Gunaacht.
Du bleibschd in meinem Herz, als enner, der gäre lacht
gär enner trinkt, gäre sproocht un dobei gär en raacht
Genaacht Vadder, Genaacht
Mit deinem Mut un deiner Kraft gingschd du stets voraus un nä du hasch dich nie geschont
du bischd es Selbschdvertaue, Selbschdverständnis un die Hoffnung, die Heit in mir wohnt
Du haschd oft verzichtet, nur, dass es mir an nix fählt
du liesschd mich das nie merke. Un haschd du dich noch so sehr gequält
Du haschd net vill an dich, awa an die Nähschde gedacht
Jetzt is die Zeit komm, ze Ruhe
Gunaacht Vadder, Genaacht
Refrain
Die Bääm sin kahl, es rähnt un de Himmel wolgeverhang
Ich fiehl mich leer, mei Herz is voller Trauer! Du bisch gang!
Ich versprech da für mei Bruder un mei Mudda bin ich immer do
un das Wisse, sie sinns fa mich, macht mich in meiner Trauer e bissje froh
un dass das heit so is, dofor haschd du alles gebb, alles gemacht
Jetzt is die Zeit komm, zu Ruhe
Gunaacht Vadder, Genaacht
Refrain
Un kommt fa mich die Zeit ze Ruhe, werr ich kenn Angschd han ze Geh'n
Ich werr mich freie, dich widderzesehn
Den, dessen Worde niemals verhalle
un die Hand, die ich hielt, werd dann mich wedder halle
Dann werd getrunk, gefeiert, gedanzt un vill gelacht
doch jetzt is Zeit zu Ruhe! Genaacht ich han dich lieb Vadder! Genaacht
|
Streaming and Download help
If you like Songschreiwa Piet, you may also like:
Bandcamp Daily your guide to the world of Bandcamp